شراب پی کر ہنگامہ کرنے والے ہریانہ کے پانچ مسافروں کو گرفتار کر لیا گیا۔

ہریدوار۔ نگر کوتوالی پولیس نے آپریشن مریمادا کے تحت شراب پی کر ہنگامہ کرنے والے ہریانہ کے پانچ مسافروں کو گرفتار کیا ہے۔ مسافروں کی گاڑی کو ضبط کرنے کے ساتھ ساتھ ڈرائیور کے خلاف موٹر وہیکل ایکٹ اور باقی چار افراد کے خلاف پولیس ایکٹ کے تحت مقدمہ درج کر لیا گیا ہے۔ وشنوگھاٹ علاقہ میں کچھ لوگوں کے ہنگامہ کرنے کی اطلاع پر ایس آئی پرکاش چند پولیس فورس کے ساتھ موقع پر پہنچے اور شراب کے نشے میں ہنگامہ کرنے والے پانچ لوگوں کو گرفتار کرلیا۔ انہیں کوتوالی لاکر پوچھ گچھ میں انہوں نے اپنے نام رویندرا، پروین کمار، بلو ملک، سونو چودھری اور کرم ویر تھانہ چھیہسا تحصیل بلب گڑھ ضلع فرید آباد ہریانہ کے رہنے والے بتائے۔ پولیس نے گھاٹ پر نشے میں دھت گاڑی چلانے اور ہنگامہ آرائی کے خلاف کارروائی کرتے ہوئے گاڑی کو ضبط کیا اور ڈرائیور اور اس کے دیگر ساتھیوں کے خلاف 185 ایم وی ایکٹ کے تحت چالان کیا۔ ایس آئی پرکاش چند کے ساتھ پولیس ٹیم میں کانسٹیبل سچن کمار، ونود، مہیپال سنگھ اور سریندر سنگھ شامل تھے۔